Þetta málverk Jóhannesar Geirs á að sýna Flugumýrarbrennu. Hann málaði syrpu mynda af atburðum sem gerðust í Skagafirði á 13. öld, Sturlungaöld.
Flugumýrarbrenna (1253) var einn óhugnanlegasti atburður Sturlungaaldar. Þar reyndu óvinir Gissurar Þorvaldssonar að brenna hann inni. Yfir tuttugu manns fórust í brunanum, en Gissur slapp með því að sökkva sér í sýruker. Ef þú vilt koma við á stöðum sem tengjast atburðum á Sturlungaöld og fá að vita um hvernig sagt er frá þeim í Sturlungasögu, og um litríkar persónur hennar og örlagaríka atburði, komdu þá Á Sturlungaslóð í Skagafirði.
Sturlungaöldin, eins og þrettánda öldin var kölluð, er kennd við átök vestlenskra höfðingja af ætt Sturlunga við höfðingja af ætt Ásbirninga, sem öllu réðu í Skagafirði. Þeir börðust líka við aðrar gamlar valdættir um allt land. Inn í átökin fléttuðust árekstrar við Guðmund góða Arason Hólabiskup um völd og áhrif.
Þrátt fyrir að Sturlungaöld einkenndist af grimmdarverkum og ógnvekjandi bardögum hafa atburðirnir yfir sér ævintýraljóma og oft er vitnað til þess sem þá var, enda um að ræða vitnisburð samtímaritara sem lifði atburði þessarar ógnaraldar. Þú getur farið milli sögustaða á eigin vegum og valið þá þjónustu sem í boði er á hverjum stað. Þú getur notið kyrrðar og fegurðar náttúrunnar og fylgst með búskap og öðru bardúsi um leið og þú nýtur sögunnar. Þú getur farið á hestbak, í gönguferð með sögumönnum eða á eigin vegum, tekið sundsprett í heitum og heilsusamlegum sundlaugum eða baðað þig úti í náttúrunni að hætti miðaldamanna.
Í Upplýsingamiðstöðinni í Varmahlíð getur þú fengið sögukort og upplýsingar um staði og þjónustu Á Sturlungaslóð. Þú getur komið við á Örlygsstöðum, Haugsnesi, Flugumýri, Hólum, Hegranesþingstað, Glaumbæ og Víðimýri. Fáðu upplýsingar um þjónustu og viðburði sem tengjast Sturlungaslóðinni í Upplýsingamiðstöðinni í Varmahlíð
