Í meira en hálfa öld hefur Byggðasafn Skagfirðinga boðið upp á sýninguna „Mannlíf í torfbæjum” í Glaumbæ, þar sem sjá má hversdagsáhöld í sínu eðlilega umhverfi vitna um horfna tíð og daglega iðju fólks fyrr á öldum. Við Glaumbæ eru einnig tvö 19. aldar timburhús, Gilsstofa og Áshús, en í því síðarnefnda er rekið kaffihús og einnig safnbúð. Þar má upplifa stemningu liðinna tíma og bragða á gómsætu bakkelsi að þjóðlegum hætti.
Á efstu hæð Áshúss er sýning á ýmsum heimilisbúnaði. Þar er einnig 300 ára kaffisaga Íslendinga, þjóðbúningar og útskornir nytjahlutir, sem margir eru eftir Hjálmar Jónsson frá Bólu og af heimili hinnar merku átta barna móður á Merkigili, Moniku Helgadóttur. Heimsókn í torfbæinn og Áshús tengir okkur við forfeður okkar og rammíslenskar rætur á ógleymanlegan hátt. Glaumbær er við Sauðárkróksbraut (þjóðvegur nr. 75), skammt norðan við Varmahlíð.
Við hlið torfbæjarins stendur Glaumbæjarkirkja sem vert er að skoða. Minnisvarðar eru einnig allnokkrir á svæðinu, m.a. um Guðríði Þorbjarnardóttur, "fyrstu hvítu móðurina í Ameríku". Einnig er þar minnismerki um Gísla Konráðsson sagnaritara, og í kirkjugarðinum hvílir Miklabæjar-Solveig, sem var ein þekktasta afturganga skagfirkskrar sögu.
